LAIN na usab nga sanga sa LBC, ning higayuna sa dakbayan sa Bogo, ang gitulis kagahapon sa buntag.
Gihimulbulan sa duha ka mga tulisan nga yanong nisibat dala ang P70,000 nga kita ug mga butang sa mga kawani kagahapon sa alas 8:45 sa buntag sa Barangay Libertad, dakbayan sa Bogo.
Si Chief Insp. Germano Mallari, hepe sa Bogo Police Station nga nahinabi sa dySS Super Radyo ug Sun. Star Superbalita, niingon nga paspas ug wa kaabot sa singko minutos ang paghimo sa duha ka mga tulisan nga nisakay sa kolor itom ug blue nga motorsiklo.
Ang duha ka mga tulisan pulos nanagsul-ob og kawo, naka-shorts ug nagkarsones, usa niini nagdalag .38 caliber revolver.
Sa pag-abot sa duha, kalit kini nga nisulod sa LBC, giduol ang customer associate nga si Angel Mary Solit Estrera, dayon gitiunan sa armas ug nideklarar og tulis.
Way nahimo si Estrera tungod sa iyang kahadlok, lakip ang ilang branch manager nga si Melicio Maiton, ingon man kaubang si Camelo Damos.
Gidala sila sa likod nga bahin sa establisemento ug gitapok samtang ang mga tulisan nangaykay sa ilang mga butang.
Nakuha ang ilang mga cell phone, pocket wifi, ingon man ang kita nga P70,000.
Human sa pagpanulis, ang duha ka mga tulisan yanong ninggawas sa LBC nga way nakabantay bisan kon ang tupad nga Palawan Pawnshop dunay guwardiya
nga naka-duty.
Gibutyag ni Mallari nga way nakabantay sa duha ka mga tulisan kay way kagubot nga nahitabo.
Siya niingon nga human sila nakadawat sa maong impormasyon, dali silang mipahigayog hot pursuit operation ug nipahibawo sa ubang police stations nga mopahigayog road block.
Dunay duha ka mga lalaki nga nisibo ang description nga nagsakay sa motorsiklo sa lungsod sa Medellin.
Dihang gisusi,nasuta nga di mao ug naatol lang nga gikan sa dakbayan sa Bogo dihang nahitabo ang kremin.
Ang LBC Bogo wa say guwardiya nga nagbantay. Giingong dunay instruction ang management nga kon ugaling dunay mahitabo nga tulis, ihatag ang
kwarta aron malikay sila disgrasya nga mapusilan, dugang ni Mallari.
Siya niingon nga di pa sila makasulti kon unsa nga grupo, lokal ba o gikan sa ubang lugar sanglit nagpadayon ang ilang hot pursuit operation batok sa mga tulisan.
Hinuon ilang gikuhaag kopya ang footages sa close circuit television (CCTV) camera sa LBC.
Ilang nakita ang duha nga wa magtabon sa nawong, apan pulos nagsul-ob sa kawo.
Sa miaging semana, usa ka sanga sa LBC sa Taboan, dakbayan sa Sugbo, gitulis usab.
Usa sa mga suspek nadakpan na hinuon sa kapulisan. Sayo ning buwana, usa ka sanga sa LBC sa Tabok, dakbayan sa Mandaue, gitulis usab sa tulo ka mga tawo.
Ang mao nga mga sanga way guwardiya apan dunay mga CCTV camera.
Laing sanga sa LBC gitulis sa 2 ka tawo | Sun.Star
Laing sanga sa LBC gitulis sa 2 ka tawo..
Originally Posted by lhorenzoo
Reply With Quote
Posting Permissions
