Ni Jonathan F. Tumulak
Saturday, April 13, 2013
NAGDUDA ang inahan sa usa ka tinun-an nga giaku*sahang nang-shoplift sa usa ka department store nga gikulata sa mga security guard ang iyang anak hinungdan nga namatay.
Unang giingong gipatol ang batan-ong lalake, apan pagdala sa punerarya ug sa pagsusi sa inahan, naputos na kini sa daghang mga bun-og hinungdan sa iyang pagduda.
Sa pagsuwat ning balita, wa pa mahuman ang gipahigayong autopsy ni Dr. Nesto Satur, chief medico-legal officer sa Regional Crime Laboratory.
Ang ngalan sa tindahan nga naa sa downtown Cebu City gipugngan una ning mantalaan samtang wa pa makuhai sa ilang habig ang mga opisyal.
Ang namatay giila nga si Mario Alce Ducayag, 23, taga DAS, siyudad sa Toledo, kanhi office staff sa mining company nga nagbase sa Toledo ug nagtungha og kursong house keeping dinhi sa siyudad.
Sa pasiuna nga imbestigasyon nga gihimo nila ni SPO4 Alex Dacua, PO3 Lou Pagara, PO3 Leroy Baguio ug PO1 Reuful Adalim sa Homicide Section sa Cebu City Police Office (CCPO) nagbutyag nga nisulod ang biktima sa tindahan niadtong Biyernes sa hapon.
Sa pagdayong gawas sa tindahan, giharang siya ni lady guard Margie Gaser tungod sa usa ka rubber sandal nga balor og P395 nga wa mabayri sa cashier.
Gidala siya sa security office sa 4th floor sa maong tindahan ug giimbestigar ni chief security Maurecio Doblados Jr. kabahin sa nakit-an nga sandal.
Niinsister si Ducayag nga iyang nabayran ang sandal sa cashier.
Apan sa pakisusi nga gihimo sa cashier, nasuta nga wa gyud mapanso ang sandal nga nagpamatuod nga wa kini mabayri sa biktima.
Tungod niini, ang security guard nga si Jeoffrey Aquino uban sa pag-abag sa iyang kauban nga si Cesar Celerio moposas na unta sa biktima aron dad-on sa police station, apan nagsigi kini og lugnot-lugnot ug nagkisi-kisi kay di magpaposas.
Mao na lay nakita sa tulo sulod sa lawak nga natumba sa iyang gilingkoran ang biktima, nabunal ang ulo sa sawog hangtod nga mibuwa ang baba.
Ilang gitawgan ang company nurse sa tindahan.
Wa magdugay niabot ang mga sakop sa Emergency Rescue Unit Foundation (ERUF) ug gidala ang biktima sa Cebu City Medical Center (CCMC).
Gideklarar nga dead on arrival ang biktima.
Si Fe Ducayag, inahan sa biktima, niabot sa tambalanan pasado alas 9 sa gabii niadtong Biyernes.
Nadala na sa Surelife Funeral Homes ang iyang anak ug sulod sa punerarya nakita sa inahan nga napuno sa bun-og ang lawas sa iyang anak.
“Nakita namo uban sa inahan nga may bun-og sa liog, tiyan, buko-buko ug mga kamot,” matod pa ni Jeff Tumulak, manager sa punerarya.
Dugang sulti sa inahan ngadto kang Tumulak nga way sakit nga patol ang ilang anak ug way record sa kapolisan ug sa kanhi niya opisina nga gitrabahoan nga nanghilabot og butang. Dexie Mae I. Algabre/Gladys L. Cabisay CNU Comm Interns
Source:
Tinun-an namatay sa kulata sa mga guwardiya? | Sun.Star
Tinun-an namatay sa kulata sa mga guwardiya?
Originally Posted by porbidaman
Reply With Quote
