***..

Haw-ang kining galamhan nga daw may gipangitang boot maangkon,
Nanikaysikay apan wala nasayod sa kung unsay tiunayng tumong,
Nagpangutana ug boot matugkad ang bili ning kalibutanong pagpakabuhi,
Apan dia latagaw, nagpautaw-utaw, wala'y padulngan wala'y gimithi.

May mga damgo apan hanap sa matag higayon nga gisulayan ug kab-ot,
Gibanlas sa sulog ngadto sa awaaw, nagpunay na lamang ug pinaabot,
Kalibutanong kalipay tood nag-awas ug dili makumkum ning mga kamot,
Mga pasundayag sa katahom nga mahanaw lamang sa usa ka pamilok.
Sa kauhaw dili makatambal bisan sa pipila ka higayong gisulayan ug yarok,
Mahubog na lamang kadugayan sa kalipayng pinugos gitagamtam ug gilad-ok,
Hain ug asa makaplagan ang tambal ning tumang kauhaw ug kahaw-ang,
Nga dugay nang panahon gipangita aron mahupay ang nasinating kalad-ang.

Nanglabay na ang katuigan nga daw wala'y unod ug napuno lamang sa lumot,
Hinan-ay na tood ang tanan apan nganong daw ang dagan sa tanan nangalukot,
Gisubay ang dalan nga gituohang makiangayon alang ning akong kalag,
Apan dia ning kayda naghinuktok, dal-a intawn ngadto sa saad mo ugma damlag.