***..

Mingbukwas ako gikan sa gihigdaang kama. Niabot na gayud ang takna nga pipila na ka bulan gipangandaman. Milingkod ako mintras nanampiling, may kaakohan ba ako aron malampos kining tahas? Nagpanglantaw ako balik sa mga takna diin nagsugod among pagpangandam. Pipila ka gabie ug kabuntagon nga walay tulog, pipila ka dalan ang gisubay-subay ug may higayon pa nga maabtan ug dakong ulan ug init apan nagpadayon gihapon. Pagkakutasa sa maong mga higayon, apan paigo ba ang tanan aron mahuman kining maong tahas nga akong sagubangon karon?
Alas dos na sa hapon ang among kawsa naabot sa Tabuelan, daw puno sa kasadya ang maong lugar. Pagka anindot sa pahiyom ug ngisi sa mga misalmot ug maingon man sa nag mugna ning maong lumba. Nakapangutana ako sa akong kaugalingon, may pahiyom pa ba kaha ako inig abot sa kinatumyan? Dili lalim ang usa ka gatos kilometros, hilabi na nga mosaka kami sa gikaintapang bukid sa balamban ug maglugsong padulong sa siyudad.
Giandam ko ang akong kaugalingon, kalag ug panghuna-huna. Apan may kuwang, daklit lamang ug gipaminaw ko ang tingog sa pikas linya ug nadungog ko ang tingog nga nagadugang kadasig aron makab-ot ang kalampusan. Ang tingog nga daw musikang nagbagting-bagting ning galamhan. May igo nang pahiyom hangtod maabot sa Talamban.
Nagpundok na ang tanan, hapit na magsugod ug inanay ko nga gihuyatid ug giinat ang mga kaugatan. Taod-taod may nadungog akong sipang buto timaan nga mahimo nang magsugod sa pagdagan. Unang baynte kilometros kuyog ko si Catchme ang ikapito sa nakahumang babaye, nakuha namog duha ka oras lamang. Apan nagbulag mi tungod kay may gipamati siya nga kakulian. Nagpadayon ako hangtod sa traynta kilometros ug nang gawas na ang kalapoy sa kalawasan. Nanghugot ang bagtak ug paa, busa minghunong ako nangita ug tindahan mapalitan ug haplas. Gikalipay kong may omega, busa gihilot ko akong mga paa ug bagtak. Minghinay ako ug lakaw dagan hangtod naabot sa ika trantay singko kilomteros ug akong nabagalan ang kinaham puto ug sikwate halad alang sa mga nanagan. Mingpahulay ug makadiyot samtang sa paa ug bagtak naghilot pag-usab. Subo akong paminaw apan gilingaw ko na lamang ang kaugalingon sa pag inom sa sikwate. Tulo ka baso una ako minghukom sa pagpadayon, lakaw na lamang ug dagan dili mahimong ahaton ang kahimtang.
Apan gibundakan sa ulan hadool sa Poblacion sa Asturias, nakapangagho ako sa pagngil-ad ug kalit sa panahon. Hinay akong midagan ug giusab usab ang gikusgon sa matag tikang. Naabot ko ang Balamban sa tungang gabie, 12:35 sa akong orasan. Unom ka oras ug trayntay singko minutos ang sinkwenta kilometros.
Piskay pa ang kalawasan apan gikahadlokan ko ang paa ug bagtak nga perti na jud hugota. Busa gihigtan ko na lamang ug lastiko aron dili mabati ang paghugot niini. Mingpahulay kadiyot ug mingkaon sa gidalit nga sospas nga may itlog. Daklit lamang ug mikagiw na usab ako ngadto sa kangitngit nga walay kasiguradoan. Tangason nga bukid ug napuno sa tanghaga, awaaw ug tiawan. Dili ko masabot ang gibati, matag lakang daw
sama ug nagdagan. Matag tunob gihalad ngadto sa kahitas-an.
Walay luna ang kapildihan o pag atras ning tahas. Busa padayon lamang, ngolngol na ug sugod ang kalawasan apan may pahiyom pang nahibilin ning mga ngabil.
Naabtan ko si Takas ug si Cobra, ni timbaya ako ug nipadayon. Igong kusog nga gipangaliya, ulana kining kalag ug bas-a. Pipila ka oras nga ang kahilom taliwala sa kangitngit makabungol. Nagdugang kahadlok ug kahingawa. Mosukod sa kaisog sa kalag aron makigbisog. Ug ngadto sa taas sa bukid gisukna ko pag usab ang kaugalingon. Kining kinabuhing, sama niini galatas nga daw wala'y kasiguradoan may igo pa bang kusog aron matapos ang gipanaad? Mihunong ako ug miligdas makadiyot sa dalan mintras kusog ang pagbunok sa ulan. Nanootsoot ang kabugnaw sa kalawasan apan wala kini makatandog sa tinguha nga makab-ot ang kalampusan. Nangkitib ang mga wait ug nagpasalamat pag-usab ngadto sa kahitas-an. Giandam ko pag usab ang kaugalingon, alas 4 pa sa sayong kabuntagon ug may 30 kilometros pang daganon aron kini mahuman. Apan dili ko na mapiko pa ang tuhod, pagkasakita sa akong gibati. Diriyot na mitulo ang mga luha o basin nakatulo na apan wala ako nakamatikod. Mahimo pa ba ko ning humanon? Sukna ko sa akong kaugalingon. Gisulayan kog inat pag usab ang kaugatan uban sa panghinaot nga maulian. Tood man malihok ko na apan ginagmay nga lakang na lamang. Giantos ang dulhogon hangtod naabot sa usa ka tindahan diin namainit ako ug naabtan sa pagsubang ni haring adlaw.
Pagkaanindot aninawon sa maong takna. Daw damgo, nalimtan ko ang gibating sakit sa paa ug lukonan. Nahibalik sa akong panimoot, mag dose oras na sukad sa pagdagan apan kinahanglang magpadayon. Dili ko na usab hapit matikang ang mga tiil, apan halayo pa ang tapos. Mahimo bang dili na lamang mopadayon? Pagkadaghan sa pagsulay nga nahiagoman.
Apan wala'y luna sa akong kasing-kasing ug kalag ang kapildihan sa maong takna. Kun mahimong kamangon ang dalan hangtod maabot ko ang kinatumyan mahimong buhaton ko. Nagkadaiyang pamaagi aron maabot lamang, may higayon nga takilid ko kini nga gidagan, talikod ug daw sama sa kabayo murag naglayat ug ginagmay.
Pasado na alas diyes sa kabuntagon nga naabot ako sa ganghaan sa Family Park. Nakapahiyom ako, hadool na ako sa kalampusan. Giisa ang mga kinumo ug militok. Dili gayud Niya ihikaw ang kalampusan kun ligdong ang tinguha. Gilakaw ko na lamang ang nahibilin gilay-on.Nahinumduman ko pag usab ang mga tawo nga nahimong bilinhon aron makab-ot ko kining kalampusan, akong pamilya, ang Dagan Caritas ug maingon man ang binuhat nga nagdugang kadasig karon. Giliraw ko ang mata ngadto sa orasan, napulo ka oras ug trayntay dos minutos! Nakab-ot ko gayud ang kalampusan, luyo sa kasakit, kangitngit, pag-inusara, pagkawala ug paglaom, higayon nga daw nasaag, mga tangason nga dalan, katugnaw, may utlanan gayud ang tanang pagsulay. Sa matag hagit sa kinabuhi sa pakigbisogi niini, ang kahilom taliwala sa kangingit usa ka kahigayonan aron matugkad ug masinati ang kaugalingon. Molurang ang bagyo busa sugata ang kalampusan nga puno sa kadasig ug pahiyom. Dili lamang kini dagan, dula o lumba, sukdanan kini sa pagkatawo ug panglantaw sa kinabuhi.

Nahuman namong tanan sa among pundok ang maong lumba
sulod sa gitagana nga oras ug wala'y nahiagom sa grabeng kakulian sa kalawasan. Busa kaming tanan mapasalamaton ug nangandam na usab sa bag-ong tahas, pag alagad ug pag paambit sa among grasyang nadawat.




pahiyom sa wala pa nag sugod.. kiat sah kay walay raba'y kita nig tungas




we have rocked the boat, 7/7 finishers. 2 top ten.
catchmeifyoucan 7th, kneelai 1Oth.

guys? Lol... (kiang noon ang giplace)