***..

Pagkakutasa ning adlawa naglagiting ang kainit,
gipahiran ko ang singot diyot na mauga'g pilit-pilit,
sa unahan napanglantawan lantayng kawayan,
inanayng gikawhat ang lawas maoy padulngan.

Mipadailos ang lawas sa kabugnaw sa maong lantay,
mihinanok ug gibayaw ang panumduman ug inanay,
sa mga kanhi panghitabo ning kinabuhing nag inusara,
sa damgo, gibalik ako sa nagbinugtong kong kayda.

Gihadla sa kagahapon pag-usab kining balatian,
mihuot, paspas ang pagbutok ning dughan,
may saad pa akong boot pa unta nga matuman,
apan sa kapalaran, nahikawan imong gibudhian.

Napugwat ako gikan sa akong pagkahinanok,
midagayday nga mga luha sa aping nagpunsisok,
Hadla sa kagahapon mahimo bang undangon?
dili ko na boot pang bisan ug gamay ikaw handumon!