Tom’ mikasa' sa shotgun
Charmaine P. Lirazan Sun.Star Superbalita
NAGWELGANG union workers sa Gaisano South kagahapon nireklamong gi-harass ni Mayor Tomas Osmeña.
Gisaway usab nila ang kapulisan nga giingong wa motuman sa 50 metros nga distansiya gikan sa picket line.
Matod ni Joy Lim, education and information officer sa Associated Labor Union-Trade Congress of the Philippines (ALU-TUCP), nga si Osmeña nga nagtakin og 9mm pistol uban sa iyang mga police escort kalit nga nibutho sa picket area ug nikasa sa iyang gibitbit nga shotgun dayong singka “get out, get out.”
Iya pang gilabni ang taptap sa nawong sa usa sa mga raliyista dayong tulod niini.
“It’s very unethical for a mayor to do so. Intimidating kaayo iyang gibuhat. As a father of the city, dapat balanse unta siya. Giestorya unta mi niya kon unsay nahitabo,” nagkanayon si Lim, kinsa niangkong wa makatingog human nasaksihan ang gibuhat sa mayor.
Si Lim nga nasagmuyo sa gibuhat sa mayor ug nihulagway niining pagpang-harass nagkanayon nga mosang-at gyud sila og legal action batok kang Osmeña.
Matod niya nga duna silay katungod nga molusad og protesta kay duna silay gisang-at nga notice of strike ug gipahibawo pa ang buhatan sa mayor.
Wa na hinuon maabti sa Sun.Star Superbalita ang mayor kay giingong wa ra usab kini magdugay sa dapit.
Sa taho sa dyLA, giangkon sa mayor ang pagdala niya og duha ka mga armas apan matod niya nga isip proteksyon lang kini sa iyang kaugalingon.
Matod niya nga di pagdapig sa mga Gaisano ang iyang gihimo kon di igo ra niyang gipatuman ang “peace and order” ug gibadlong ang gihimong pagbabag sa mga raliyista sa agianan.
Iyang giangkon nga gipangunayan niya og badlong ang raliyista aron di mahisama kaniadto nga si kanhi CCPO chief Melvin Gayotin ang nakiha dihang nipatunga sa gihimong rally sa usa ka hotel.
Apan ang binuhatan sa mayor kusganon nga gikondenar sa taas nga opisyal sa ALU nga si Atty. Democrito Mendoza ug nibahad nga mosang-at og reklamo sa Visayas Ombudsman.
Matod ni Mendoza nga duna silay maayong relasyon maong nakurat siya sa gipakitang taras niini.
Giangkon ni Lim nga nakurat sila sa gipakitang puwersa sa kapulisan nga gipangunayan mismo ni Supt. Pablo Labra II uban kang C/Insp. Arnel Banzon nga unta malinawon man ang ilang gihimong lihok-protesta pinaagi lang sa pagbitbit og placards.
“Mura man mig mga kriminal pero okey lang at least naa silay trabaho,” pagkomedya pa ni Lim.
Tulo ka mga patrol car apil na ang usa ka team sa Special Weapons and Tactics (Swat), mga sakop sa Speed cop ug ubay-ubay nga unipormadong pulis gikan sa Carbon police station ang gi-deploy sa picket area.
Matod ni Lim nga wa mo-observe ang kapulisan sa distansya gikan sa mga raliyista ug mas duol pa hinuon sila sa picket area.
(Agosto 14, 2008 isyu)
MERGED: All about Gaisano Capital South Rally
Originally Posted by uzumaki
Reply With Quote
Posting Permissions
