Kini ang akong suliran

[tatajhun]

---

Ug asa naman ang uban natong kakaubanan sa tambag ning atong traha alang sa tanan!

[joop]

ug ang takna milamba na usab haduol sa kaodtuhon, ato kining isimplang sa makadaghan kini atong KUTAY halayo sa unahan arun kini ma-lusi ug matagad sa uban natong kaigso-unan nangitag kalambigitan sa kinabuhi,lol

[tatajhun]

Maayong Adlaw sa atong mga kaigso-onan sa buhat dinhi sa atong nagpabiling kutay sa tinud-anayng panlimbasog sa kinabuhi. Maayo ana-a kamo sa maayong panglawas ug panghuna-huna karong gutlo-a.
Aduna ako usab nga ipaambit kaninyo nga suliran nga daw nagpakutaw sa akong utok ug gayud nagpahu-ot sa akong galamhan daw dili ako makatulog niini kung dili nako masuta ang usa ka dakong tubag niini.

Sa akong payag pahulayanan ana-a kini mahimutang sa tunga sa akong umahan dinhi sa bukirang parti sa Talamban nga tawag sa ngalang Cambinokot. Tungod udtong tutok lagi sa tumang ka init ako nisuway ug lingkod lingkod sa bakanan niining payag daw gipamati ang maanindot nga huyohoy sa hangin sa akong kalawasan nga daw gipaningot tungod sa kaainit sa sabaw sa utan nga akong gi kaon. Bunga sa kala-ay akong gikuha ang akong tabako nga giputos ug pamantala-an inubanan sa dahong laya sa lumboy nga akong pinangayo didto sa akong amigong silingan nga gihinganlan Pitoy. Niadto ako sa akong abuhan ug nangita sa agipo aron modugka sa akong tus-tus ug sa wala damha akong nakita ang duha ka langaw nga daw murag lain sa panan-aw para ka nako ang ilang gibuhat, ti-aw mo nang ang usa ana-a mahimutang sa ilawom nga bahin ug ang usa usab nagapatong sa iyang luyong parti. Kung siguro sa tawo kini mahitabo ngil-ad ug hilas kini lantawon. Apan sa akong pagka hilabtanon ako na kuryuso sa ilang gibuhat nga mura gayud ug lawasnong kalipay ang ilang gisaw-an niadtong gutlo-a ug ako nakahinumdum nga ana diay ang Kodak na may ngalan nga Canon sa akong igsoon nahabilin didto sa akong lawak pahulayanan ug maayo nalang intawon gikaluy-an pa adunay pay usa ka shot nahabilin sa film niini ug sa walay pagduha-duha ako dayon gihulagwayan ang gibuhat sa duha ka langaw. Ang hitsura mao kini?



Ug sa akong pagbalik sa uma dili mawala sa akong pangisip nga ako ba nakasala sa paghilabot sa ilang kalipay nga gisaw-an niadtong mga gutlo-a? Para ninyo isip usa ka yanong lumulopyo unsa man ang angay nako untang buhaton niadto kung kamo ana-a sa akong sitwasyon? Kahibaw ako nga kataw-anan kining akong suliran apan lagi sa akong pagka relihiyoso nabati ko ang konsensya sa akong galamhan daw gitook ako sa pagmahay ug sa akong pagkakuryosohon ug pinangga ko gayud ang tanang butang o hayop sa akong palibot nga hilabi na nga mao kining mga matang ang nagbuhi ka nako kay tungod mao kini ang akong panginabuhi-an. Palihug tabangi ug tambagi ako Kini ang akong suliran.

Daghang Salamat,
TTJ

[yiennahs]

dear TTJ,
inig uli nalang ko mutambag hehehe
salamat diha

[tatajhun]

OK ra Inday Yien...ayo ayo ...

[tatajhun]

Maayong Buntag sa atong mga magtatampo nangita ako sa alibyo ug tambag ninyo mga kahigalaan.

[yanong_banikanhon]

Maayong adlaw sab kanimo diha, papaTa.

Pasayloa nga karon pa nako mabasahi ang imong tampo kay unsaon man lagi, sa kapaspas modagan sa orasan, usahay malubong kita sa mga inadlaw-adlawng buluhaton.

Bweno, ania ang akong yanong panglantaw bahin sa imong tampo.

Sa akong paghagpat sa suliran nga imong gibatbat, papaTa, akong nakita nga wala kay tulubagon ngadto sa duha ka langaw nga imong gikuhaan og hulagway. Kay sa punto de juez, igo lang kang mikuha og hulagway sa crime scene. Trespassing og public obscenity ang kaso aning duha ka langaw.

Angay pa ganing magpasalamat kining mga langawa sa imong kamanggiluy-on kay kun tawo pa nga gisapot ang nakakita sa ilang gibuhat, mopilit gyud na silang duha sa tsinelas or silhig ba kaha nga ilamba sa ilaha.

Manghinaut lang ko nga migamit og condom kanang laki nga langaw kay ubay-ubay na ra ba pud ang kadaghanon aning mga langawa. Sige lang na sila'g lupad-lupad, bisan asa makatugpa. Motugpa sa tinapok nga hugaw sa tawo, dayon motugpa pud sa atong ilong. Paskang hasola! Matud sa census sa National Statistics Office (NSO), mas daghan ang mga pilipinong langaw kaysa mga pilipinong tawo. Wala pa'y labot ana'g ihap kadtong mga tawo nga mura'g kina-iya'g langaw.

Manghinaut ako nga kining gamay nakong tambag makahatag og alibyo sa imong gibati nga kabug-at sa konsensya bahin sa paghulagway nimo anang duha ka tampalasang langaw. Alang kanimo papaTa, akong idalit kining awit nga nag-ulohan 'Langaw sa pasaw nitugpa sa akong nilugaw'.

[g0dmenuelz]

laoma bag ka bisaya....

[petite fleur]

nag dugo akong ilong

[yanong_banikanhon]

Lingaw-lingaw man lang ni ato, mga higala. Dala pu'ng pagbansay-bansay sa atong sinultihan nga sinugbuanong binisaya.

Kining tanan inubanan sa panghinaut nga makahatag kita'g katagbawan sa mga tawong duna'y gipas-an nga suliran og nangita'g kasumbungan.

Alang kanatong tanan, manghinaut pud mi nga kining atong kutay (thread) diri sa istorya.net makahatag og gamay'ng pahiyom sa inyong maanyag/ambongan nga panagway. Kun magsige man lang gud ta og ka-serious, dali ra ta matiguwang. Life is too funny to be taken seriously.