TELLER sa banko nakit-an sa iyang silingan nga nagbitay sa punoan sa mangga kagahapon sa alas 5:00 sa buntag sa Barangay Colawin, lungsod sa Argao, Sugbo.
Apan ang paghikog ni Ivy Cope Montañez, 29, ulitawo, teller sa Rural Bank of Cebu South Carcar Branch, nakapalibog sa iyang banay.
Kay sa iyang suicide note igo ra siyang nangayo og pasaylo ingon man nanugon nga puti nga lungon ang sudlan sa iyang lawas, kinahanglan nga sa nauyonan niyang punerarya siya paserbisyuhon ug sa Mayo 22 siya magpalubong.
Gawas niini, ang iyang suicide note wa gyud magtug-an sa rason sa iyang paghikog.
Si PO1 Bernard Banogon, desk officer sa Argao police nga nahinabi sa Sun.Star Superbalita, nagkanayon nga usa ka Boy Panerio, mag-uuma, silingan sa nagpakamatay, maoy nakakita kaniya dihang manugway unta siya sa hayupan.
Matod niya nga si Montañez naghikog sa punoan sa mangga mga 30 metros ang gilay-on diha sa luyo sa ilang balay dihang nakit-an sa mag-uuma hinungdan nga gipahibawo gilayon ang iyang mga kabanay.
Pag-abot sa mga pulis sa lugar, ang lawas niini diha na sa ubos gikuha sa iyang mga kabanay tungod kay naluoy silang nagsud-ong niini nga nagbitay sa mangga.
Nidiwalwal na ang dila niini dihang naabtan sa mga pulis sa crime scene ug ang lawas nagsugod na sa paggahi.
Hinuon ang suicide note niini dunay nakapatik nga oras alas 3:00 sa kaadlawon kagahapon.
Ang iyang amahan nga si Rene Monteñez nakakuha hinuon og suicide note gikan sa lawak niini diin dunay mga gipadangat nga mensahe.
“To my family, I’m sorry. This is my final option. Always remember that I’m always at your side. I love you so much. To my RBCS guys, good luck to all of you. God bless and more power,” matod sa iyang suicide note.
Sa iyang suicide note, nanugon siyang hayaon sa puti nga lungon, punerarya ug magpalubong siya sa Mayo 22, 2011 diha sa Argao Public Cemetery.
Siya nanamilit sa iyang mga kabanay ingon man mga igsuon.
Si Banogon niingon nga ang ginikanan naglibog gyud kon unsay motibo sa pagpakamatay sa ilang anak sanglit niadtong miaging adlaw wa kiniy gipakitang timailhan nga dunay problema.
Wa usab kiniy gibutyag nga duna siyay problema sa trabaho o personal sanglit buotan kini nga pagka-anak.
Way foul play ang kamatayon niini apan nagpadayon ang ilang imbestigasyon, labina sa gitrabahoan niining banko kon wa ba kiniy suliran sa trabaho.
Gipatik sa mantalaang SuperBalita Cebu Mayo 11, 2011.
-------------
Teller naghikog; pulis, pamilya naglibog pa | Sun.Star
Teller naghikog; pulis, pamilya naglibog pa
Reply With Quote
Posting Permissions
