USA ka tuig kapin nga batang lalake gipatay sa iyang amahan sulod sa duyan pinaagi sa pagkulata tungod sa iyang kasuko sa pagsige niini og hilak niadtong ala una sa hapon sa Brgy. Sapangdaku, siyudad sa Sugbo.
Naglisod na sa pagginhawa ang bata dihang nadiskubrehan sa inahan hangtod nga namatay, apan nilanat pa og duha ka oras una pa sila nangayo og tabang sa ilang mga mga silingan.
Si Patrick Ibo, nag-edad og usa ka tuig ug duha pa ka buwan namatay gyud tungod sa pagkulata sa iyang amahan nga si Restituto Ibo Jr., 21, usa ka kondoktor sa PUJ.
Si Kara Bantican, 25, taga lungsod sa Lilo-an, Sugbo, inahan sa bata ug nahinabi sa Sun.Star Superbalita, niingon nga human sa pamahaw iyang gipakatulog ang iyang anak sulod sa duyan.
Sa pagkatulog sa bata, iya kining gibilin sa iyang kaipon nga si Ibo nga didto sa balay sa iyang igsuon aron siya manglaba.
Human sa iyang pagpanglaba, niuli siya sa balay pasado alas 12 na sa udto.
Iyang nasugatan ang iyang kapuyo sa ilang tugkaran nga wa na magtingog.
Iya kining gipangutana kon unsay nahitabo hangtod nga niangkon nga iyang nakulatahan ang bata.
Sumala pa ni Ibo nga iyang gisulod sa balay ang ilang anak tungod kay naghilak.
Iya kining gipahilom, apan wa gyud kini mopatuo hangtod nga iyang gilabtikan ang ngabil, gisigihan og sagpa ang nawong hangtud nga iyang nasumbagan ang buko-buko.
“Iya kunong gikulata kay nagsigi man kuno og hilak ang bata,” matod pa sa inahan.
Sa dihang iyang gisulod ang balay, diha na sa sawog ang iyang anak nga naglisod na sa pagginhawa ug nisulirap na ang mga mata.
Tungod sa karatol, wa na sila masayod kon unsay ilang buhaton, hangtud nga nianang pasado alas 3 sa hapon, iyang gipahibawo ang igsuon sa iyang kaipon.
Naalarma ang ilang mga silingan ug mao nay nanawag sa kapolisan.
Niabot ang kapolisan sa Homicide Section pasado alas 3 na sa hapon, apan patay na ang bata ug wa na diha si Ibo.
Ila kining giapas sa sityo Banawa ug didto naabtan nila ang suspek ug gidakop sa mga pulis.
Giangkon sa inahan nga makaduha na kini nga higayon nakulatahan ang iyang anak.
Ang unang insidente nahitabo niadtong miaging tuig dihang pito pa ka buwan ang bata.
Gisagpa-sagpa kini sa iyang kaipon.
Giasoy usab sa inahan nga kapin pa sa buwan ang iyang anak, gibiyaan siya sa iyang kaipon hangtod sa iyang pagpanganak.
Nipakita ang iyang kaipon dihang pito na ka buwan ang bata ug iya king gidawat hangtod nga sila nag-ipon.
Sukad sa ilang panag-ipon, wa siya makadungog kang Ibo nga nagduda nga di iya ang bata bisan pa man og gilayasan siya sa dihang nahibaw-an nga siya mabdos.
Samtang gitataw usab sa suspek sa pakighinabi sa Sun.Star Superbalita nga aksidente lamang ug wa siya magdahom nga mosangpot ngadto sa kamatayon sa iyang anak ang iyang pagkulata.
Dugang pa niya nga pinangga kaayo nila ang bata tungod kay ila kining bugtong anak.
Di unta buot mopasaka og kaso ang inahan sa bata batok sa iyang kapuyo tungod kay matod pa niya wa nay mobuhi kaniya.
Si PO3 Geoffrey Gutual sa Homicide Section miingon nga ila nang giandam karon ang tukmang kaso nga ikapasaka batok sa suspek.
Ila usab nga tun-an kon may tulubagon ba ang inahan sa maong hitabo kay way gihimong lakang sukad nga nadiskubrehan niya nga naglisod na pagginhawa ang iyang anak hangtod nga namatay.
Gipatik sa mantalaang SuperBalita Cebu Mayo 03, 2011.
Bata gikulata sa papa, patay
Reply With Quote
Posting Permissions
