NIGAWAS nga positibo sa drugas sa gipahigayong kinalit nga drug test ang walo sa 51 ka mga kawani sa Brgy. Basak San Nicolas, dakbayan sa Sugbo.
Si Kapitan George Rama sa pagpakighinabi sa Sun.Star Superbalita nibutyag nga pulos mga lalake ang iyang gipailawom sa drug testing kagahapon.
Iyang isunod ang mga babaye sa sunod nga mga adlaw.
Matod pa ni Rama nga mao kini ang usa sa iyang mga rekisito sa mga empleyado sa barangay sa di pa sila motrabaho hilabi na sa mga barangay tanod.
Ang kapitan nibutyag nga di makahimo ang mga tanod sa ilang tahas kon sila ulipon usab sa ginadiling drugas.
Gidugang sa kapitan nga ang walo ka mga empleyado nga positibo sa unang pagsuta sa Philippine Drug Enforcement Agency (PDEA-7) ug sa Cebu City Office of Substance Abuse Prevention (Cosap) ipailawom pa sa confirmatory laboratory test sa PDEA-7.
Ang mga positibo gikatakdang taktakon sa kapitan sa tapos niining buwana apan aduna pay kahigayonan nga makabalik sa pwesto nga biyaan ubos sa usa ka kondisyon.
“ Naa pa silay chance nga mabalik kon tagaan ko nila og details kon si kinsa ang ilang pusher o dealer ug mopailawom sila sa rehabilitation ug after three months ug di na sila positibo, ako sila ibalik sa pwesto” matod pa sa kapitan, kinsa ig-agaw ni Cebu City Mayor Michael Rama.
Gisaysay ni George nga wa niya pahibaw-a ang iyang mga empleyado nga adunay drug test nga mahitabo.
Iyang gipasabot ngadto sa iyang mga empleyado nga aduna silay tigom sa ilang brgy. Hall ug sa wa madugay niabot ang mga sakop sa PDEA ug Cosa.
Ang drug test napahigayon gumikan sa nadawat ni Rama nga mga taho nga adunay mga empleyado nga tiggamitan og illegal nga drugas.



Source: 8 ka mga kawani `drug user? | Sun.Star Network Online


bagaa na kaayo ug nawong sa mga police karn oi..