Nakabasa namo ani?
Reference:
Tambagi ko Noy Kulas: Alang kang Heart | Sun.Star Network Online
DEAR Reader,
Maayong adlaw kanimo. Di una ko manambag karong adlawa. Nagsuwat ko kalabot sa sakit kaayong kamatayon sa akong 5-anyos nga anak nga babaye. Pinaagi sa pagpasawo kanimo niini, matibhangan gamay ang among kasakit.
Namatay siya mga ala una pasado sa kaadlawon kagahapon (September 14) sud sa Chong Hua Hospital samtang nagsud-ong ming duha sa akong asawa gawas sa iyang lawak sa pediatric intensive care unit (PICU) diin siya na-confine. Sakit kaayong tan-awon nga nagsud-ong ka sa imong anak nga gitabang apan wa kay mahimo, igo ka lang sa pagtan-aw.
Nadala siya niadto lang Sabado sa hapon human makita ang mga timailhan nga dengue ang nakaigo kaniya. Bag-o lang sab siya naayo sa chicken pox mao nga huyang ang iyang immune system dihang niigo na ang dengue hemorrhagic fever niya. Bisan pag nasayo pagdala, matod sa doctor nga posibleng mao ra gihapon ang iyang dangatan kay luya man ang iyang lawas.
Sud sa tulo ka mga semana, tulo namo ka mga anak ang nangaigo sa dengue, ikatulo si Heart. Siya ang labing grabeng naigo
Si Heart among ikaduhang anak nga babaye ni Chelo. Mary Heart ang iyang ngan kay February 16 man ang iyang adlaw nga natawhan ug alang usab kang Mama Mary.
Nagtungha siya sa Kinder II sa tunghaang publiko sa Bacayan.
Una pa lang kadto niyang pagtaak sa tunghaan, nakat-on na siya sa pagsuwat sa alphabet ug kahibawo nag gamay nga mobasa. Sa ilang klase, siya ang usahay mangu sa class prayer. Mahigalaon ug malipayon nga pagkabata bisan medyo may pagka maldita kon awayon.
Dunay mga higayon nga kon maglalis mi sa akong asawa, siya dayon ang magpatunga ug hiluton ang away bisan sa kalinghod pa niyag salabutan. Siya pay momandar nga say og “I love you” timailhan sa panag-uli sa among maayong kabubut-on. Ingnon pa gyud ming “Kiss” as a proof nga nagkauli na mi sa iyang inahan.
Mangutana sab siya pirme if we really love each other sa iyang mama.
Gawas niini, kon duna siyay makaon o magpapalit ini, magpasobra gyud siyag palit alang sa iyang mga igsuon o manghod nga lalake. Ingon niana siya ka thoughtful.
Tabian sab siya ug maayong mangatarungan. Manggitahuron ug di gyud mauwaw nga motimbaya. Sa espesyal nga okasyon, di gyud makalimot, sama sa birthday. Mo-greet gyud siya ug motagana og something. She was so caring and loving bisan kinsa pay pangutan-on. Ingon pa sa among pediatrician, maayo sab og abstract reasoning o logic.
Matag biyahe nakog layo ug di mauli og pipila ka days, iya gyud nang bitbiton bisan asa ang akong seninang gisul-ob sa wa pa ko molakaw. Iya ning idug isip puli nako kay magdug man gyud mi sa pagpangatug sukad pa siya sa gamay pa hangtod ning uwahing mga adlaw sa iyang kinabuhi.
Samtang didto pa siya sa ospital, bisan di na siya hapit motubag kon pangutan-on, nangutana ko kaniya kon kinsa ko. “Si Papa” maoy iyang tubag. Dihang akong gipangutana kon kinsa ang akong pinaka love siya nitubag “Ako.”Hapit ko mohilak apan ako lang gipugngan kay diha pa man ang mga doctor. Samtang naa siya nag-ungaw sa kamatayon, magsige siyag tutok namo sa iyang mama.
Pipila ka mga oras sa wa pa siya mamatay, gusto siyang magpakugos sa iyang Mama Chelo.
Apan gidid-an siya sa doctor kay kritikal ang iyang kahimtang.
Mao diay, usa na kadto sa mga sinyales.
Baby Heart, naa ka man karon sa langit, dako kaayo kaming pasalamat nga amo kang gikauban sa pipila ka mga tuig. Hamubo man tuod, apan imong gipakita ug gipaambit kanamo unsa ang tinud-anay nga gugma sud sa pamilya.
Baby, we love you so much. Naa ka kanunay sa among panumdoman ug kasingkasing.
NOY KULAS (Papa Roger)
So "Dengue is such a killer disease, so don't take any chances. It's better to spend lots of money for prevention than losing a loveone."
Looya sa bata ni nuy kula noh. Let's just pray for her daughter og manghinaot ta nga anaa na cya krn sa kilran sa atong Amahan nga makagagahom sa tanan.
What a loss for Noy Kulas
?
Posting Permissions
