TUNGOD sa naputol nga tawag sa usa ka asawa ngadto sa iyang bana nga pulis nga gipailawom sa training, nagubot ang kapulisan sa Sugbo.
Dihang nitawag ang asawa sa iyang bana, nakadungog kini og mga buto sa pusil ingon man pulong nga ambush una pa naputol ang signal.
Nitawag sab dayon siya sa asawa sa laing pulis ug didto na magsugod ang kaguliyang.
Kadto usa ka false alarm kay ang ambush tipik ra diay sa training sa mga police official.
Tungod sa hitabo, naalarma di lang ang kapulisan, lakip na usab ang mga pamilya mismo sa mga pulis nga nag-training sa Regional Training School (RTS).
Nigawas ang report nga ang mga pulis nga nag-training gi-ambush sa mga rebeldeng New People’ Army (NPA) sa barangay Gaas, lungsod sa Balamban, Sugbo.
Ang Gaas usa sa mga bukirang barangay sa Sugbo nga gihugpaan sa mga walhong rebelde niadtong 1980s.
Kapin sa 50 ka mga senior police officer gikan sa Police Regional Office (PRO-7) gipailawom sa Public Safety Senior Leadership Course.
Kagahapon sa buntag, tipik sa ilang training mao ang scenario sa usa ka ambush sa mga rebelde.
Ila kining gipahigayon sa bukirang bahin sa barangay Gaas.
Human mokatap ang taho nga gi-ambush ang mga pulis nga nag-training sa maong dapit, duha ka mga sakyanan sa Special Weapons and Tactis (Swat) gikan sa Cebu City Police Office (CCPO) ang daling ningresponde.
Unang niresponde mao ang kapulisan sa Balamban ug unang niabot sa dapit.
Si Senior Insp. Ramon Landingin, team leader sa mga pulis nga nag-training, niingon nga natingala sila kon nganong naalarma ang ilang kalihukan.
Siya nipasabot nga ilang gipahibawo sa ilang mga labaw ang ilang kalihukan.
Gani ila mang gipahibawo di lang sa mga pulis, lakip na usab sa military nga nagbase sa dapit.
Si Insp. Wilfredo Alarcon, usa sa mga instructor, niingon nga gumikan sa sayop nga report nahunong gyod ang ilang training, nga lakip unta ang scenario sa ambush.
Kini human sila makadawat og daghang mga tawag gikan sa asawa sa mga pulis ug sa ilang mga labaw mismo.
Sa ilang pagsusi, ilang nasayran nga ang sinugdanan sa maong report mao ang tawag sa asawa sa usa sa mga pulis ngadto sa iyang bana nga nag-training gitawagan.
Atol sa pagpanawag adunay buto-buto sa armas ug maoy nadunggan sa asawa.
Wa mahuman ang ilang panag-estorya tungod kay nawala na ang signal sa cellphone ug bugtong nadunggan sa asawa mao ang pulong ambush.
Ang asawa nanawag sa ubang mga asawa sa mga pulis ug mao nay nipahibawo sa hitabo. Dunay mga asawa nga naghilak nga nagpakisayod sa PRO-7.
Tawag sa asawa ang nakaingon sa kagubot
maayo gani kay wala nagpinusilay ang SWAT ug ang mga NPA kunohay..
Reply With Quote
Posting Permissions
