***..

Nagkulismaot kining dagway samtang nagdali ug lakaw,
sa unahan ang pasaheroan tumong ning akong panan-aw,
misiyagit ang conduktor lima na lamang aron kini molarga,
gipakusgan ko pa ang paglakaw aron makasakay na.

Ug sa dihang pagtikang ko sa hagdanan perti naman hoota,
sikitsikiti matud pa sa nimasyada masulod pa kuno ang lima!
naunsa na, murag na'g sardinas ang tumoy diyot magsinabakay,
masudlan pa! perti naman gani hoota kipi-kipia mga inday!

Gipaningot intawn ako, gisulayan ug lingkod bisan ug gamay,
kining dakong sampot ang katunga intawn daw nagbitay!
Pun-anan pa ug upat! Asa kaha ibutang kini silang kuwang,
may bangkito pa diay gisuksok sa tunga, hapit gani matikwang!

Miandar na ug inanay nga mipadagan ang pasaheroan,
nag-ampo nga madali ug abot, kay ang paa gibikogan!
gipun-an pa ang dimalas, naghoot pa jud ang dalan,
busa kining singot, gikan sa agtang naabot intawn sa bugan!

Wa'y bisan usa ang nanaog aron intawn ang kahoot maibanan,
Kining panghitabo di maayong usban apan dili gayud malikayan,
bisan hoot ug ang pasehero gipaningot basta kulang paslakan,
alaot intawn apan mura rag wala ang drayber sa pasaheroan!