Diha kanimo lamang
by
, 11-12-2014 at 11:02 PM (1663 Views)
Handumon ko na lamang ikaw sama sa usa ka damgo,
kalimtan na unta ang pangandoy'ng kalipay uban kanimo,
apan bisan paman sa ingon kining panaad padayonon,
ang susuma kanimo lang gihapon, akong paabuton...
Pagkatam-is lantawon sa imong mga pahiyom karon,
dalit sa bag-ong nakaplagan nga kalipay sa iyang mga bukton,
gikumot ning dughan samtang kaninyo nagsud-ong,
kining mga luha ning aping mitulo, dili ako makapugong.
May pagmahay, migitib gikan ning dughang nanghoot,
milabay na lamang ang mga kahigayonang gipaabot,
apan sayod akong dili pa haom ang takna aron magpatihulog,
kuwang pa sa kahamtong, dili ko boot magpadala sa bul-og.
Kining pag-ampo dili ko lung-an, sa kanunay pagahugtan,
tingali dili karon, mahimong sa umaabot uban kanimo lamang,
sa umaabot kun ugaling may kahigayonan kining tanan,
dili ko gayud hikalimtan, kining tanan, diha kanimo lamang.
"ang tanan lumalabay lamang, pero magpabilin ang imong handumanan."
11/12/14