supermarionism

NINDOT kining gisugyot karon nga balaudnon nga magmando sa tanang mga buhatan sa kagamhanan, tulunghaan ug uban pang mga pamatigayon nga magbutang og closed-circuit television (CCTV) cameras.

Tumong niini aron nga mga dautan nga tawo magduha-duha na og himo og krimen kay dunay CCTV nga nagtutok kanila.
Ang House Bill 3835 nga gipangamahan ni ACT-CIS Party-list Representative Samuel Pagdilao, nagtinguha nga mapuslan ang CCTV sa pagsulbad og krimen pinaagi sa pagtan-aw sa na-rekord niini nga insidente ug labaw sa tanan pag-ila sa mga kriminal.
Malakip niini ang mga bangko, department stores, shopping malls, colleges and universities, gasoline stations, pawnshops, lending institutions, convenience stores.

Napamatud-an na man god nga dako og tabang ang CCTV sa pagsulbad sa pipila ka mga krimen nga nahitabo sa katilingban.
Bisan tuod kon daghan nang mga buhatan o establisemento ang nagbaton og CCTVs, apan duna gihapoy daghan, ilabi na mga patigayon nga wa niini.

Naay ubang mga negusyante nga nagbalewala sa kamahinungdanon niini kay di gustong mogasto kay sa tinuod lang mahal-mahal sab ang CCTV ilabi na kadtong dekalidad nga matang.
Hinuon, bisan og di garantiya ang CCTVs nga makapakgang og krimen apan mas maayo nga duna niini, ilabi na sa mga magpapatigayon, kay kon buot hunahunaon sila man lang gihapon ang makabenepisyo niini..