***..
Bag-ong Hugna sa Kinabuhi
by , 10-02-2013 at 11:44 AM (8242 Views)
Misulod ako sa gamayng hawanan diin atua siya nagligdas,
gisugat ako sa iyahang pahiyom apan sa mata may niagas,
tatawng may boot siyang ipadayag nga mga pulong,
apan walay mogawas, kahilakon ko hinoon nga nag sud-ong.
May gisinyas siya apan dili ko matugkad ang boot ipasabot,
mipadool ako ug mikupot ngadto sa iyahang mga kamot,
gipadayag ang mga panghinaot sa hinali niyang kaayohan,
miyango sya sa iyahang ulo samtang ako iyahang gitutokan.
Sayod akong nadungog niya tanan ko'ng boot ipaambit,
subo lantawon ang higalang anaa sa tumang kasakit,
apan bisan sa ingon, may gamayng kalipay 'ning dughan,
bag-ong hugna sa kinabuhi niya, karon anaa nay timailhan.
Email Blog Entry
Go to Profile
Mark as Read
