***..

Sama sa kahoyng nabuhi ibabaw ning pangpang,
kining pagbati walay lipod daghan ang gisagubang,
niturok nga wala mahibal-e ang kasiguradoan,
mag agad lamang nga mabisbisan ug moulan.

Ang kinabuhi ning kalibutan walay igong hinungdan,
mga ugat nagkapot sa mga bato ug pinasagdan,
naglaom makalungtad hangtod sa mga umaabot,
ning nahimutangan mainampingon untang maibot.

Mahatagan mo ug bili kining daw sagbot tan-awon,
nga diha kanimo naghandum sa dugayng panahon,
sayod akong kining pangandoy sama ning pagtubo,
panas man tood nakaturok mahimong mahitabo.

Hinikawan man sa mga bilinhong mga butang,
makiglimbisog makakuha ug luna sa imong dughan,
makigbugno sa matag pagsulay matagad mo lamang,
mabisbisan ug bili kining paglantaw anaa nay padulngan.

June 10, 2013..