***..

Gipakli ko tagsa-tagsa ang matag panid,
gitugkad mga pulong mong gilakbit,
nakapahiyom ako sa matag higayon,
nakadayeg sa kaligdong mo ug katahom.

Pagkabulahan sa binuhat nga kanimo makaangkon,
diin tataw ang kinabuhing himaya'g mabulukon,
mga panglantaw mo sa kinabuhing talagsaon,
apan nganong may kuwang sa imong mga pahiyom?

Sa baybayon nag inusara kang naglantaw,
ang halapad nga kawanangan imong gianinaw,
mga binanlas nga lusay nangasangit sa imong tiilan,
nangasangit, matagad mo bisan makadyot lamang.

Pipila na ang nanganti sa imong pagpangga,
napakyas, nagmasulob-on ug nitulong mga luha,
ug ania nangandoy kanimo yanong tighigugma,
andam motugkad sa imong pagka talanghaga.

Gusok matud nila para sa usag-usa,
sa kiliran ning adan para ikaw maamoma,
hadool sa dughan aron masinati tiunayng paghigugma,
ubos ning alimpatakan aron maampingan ning huna-huna.

Daklit lamang, apan nagpaniid sa imong katahom,
kuyogan ikaw sa pagbaklay ning dakong baybayon,
bugtong ikapanaad dili kalibutanong himaya,
apan ang ulayng katuyoan ug tiunayng pagpangga.

Kun may sangpotanan kining mga pangaliya,
sa maong kahigayonan ikahatag ang kinatibuk-ang gugma,
diin dili pagamahayan ang nilabayng kagahapon.
ikaduhang bathala hinaot kining pangaliya, pagadunggon....



Oct. 24, 2012

Pagkaanindot sa takna diin madungog ko ang hinay nga pagpat-ak sa ulan. Samtang ang huni sa langgam nga
baliha nagadugang sa kalipay nga gibati ning higayona samtang gipatik ko kining pagbati sa usa ka balak.